Contact Us : 9966029714

సృష్టికి మూలం ప్రకృతి. ఈ ప్రకృతి పురుషుని మీద ఆధారపడి ఉంది. పురుషుడు రెండువిధాలుగాపేర్కొనబడి యున్నాడు.

1. జీవుడు (దేహములో ఉన్నవాడు).

2. దేవుడు (దేహములకు వెలుపల మొత్తమునందు ఉన్నవాడు).

పురుషుడు, అతని ప్రవర్తనమైన ప్రకృతి , అందులోంచి వచ్చివెళ్తున్న సృష్టి , ఈ సృష్టి లో ఇమిడియున్న విజ్ఞానంఈ మొత్తం ఒక శాశ్వతమైనగ్రంధం. దీనినే *వేదం* అని అంటారు. ఈ వేదం మనలో నాలుగు విధాలుగా కనబడుతుంది.

1. శ్వాస 2.కంఠనాదం 3. మనస్సు 4 . దేహము.

వేదాలు అపౌరుషేయాలు. ఎన్నటికీ శాశ్వతంగా విరజిల్లే సత్యాల సమాహారమే వేదాలు. అలా ఋషులు ఆవిష్కరించిన ఆ సత్యాలు నాల్గు భాగాలుగా క్రోడీకరింపబడ్డాయి. అవే ఋగ్, యజుర్, సామ, అధర్వణ వేదాలు. ప్రతి వేదమూ మూడు ప్రధాన భాగాలుగా వర్గీకరింపబడింది. అవి, సంహితలు, బ్రాహ్మణం మరియు ఆరణ్యకం (ఉపనిషత్తులు – చరమ సత్యాన్ని గురించిన వివరణ). చరమ సత్యాన్ని గురించిన విచారణలో మనిషి మనసు అందుకోగలిగిన ఎల్లలను ఉపనిషత్తులు ఆవిష్కరింపచేస్తాయి.     

ఉపనిషత్ అనే మాటకు, ఉప = సమీపము, దగ్గరగా ...నిషద్ =కూర్చుండబెట్టునది అని అర్ధము. ఎవరకు దగ్గరగా? అంటే - *గురువుకు దగ్గరగాకూర్చుండబెట్టునది* అని అర్ధము. ఇవి మూలస్తంభమైన మోక్షవిద్యలేదా ఆనందవిద్యలకు దారితీస్తూ ఉంటాయి. ఆ త్రోవలో మనమూ వెళ్దామనే ఉద్దేశంకొంచమైనా ఉంటే చాలు మనకు. మన చెయ్యి పట్టుకుని నడిపిస్తాయి ఈ ఉపనిషత్తులు.

ఉపనిషత్తులు అనేకం ఉన్నాయి. సామాన్యంగా వాటిలో 108 మాత్రమే పరిగణనలోకి తీసుకుంటున్నారు. వాటిలో పద్నాలుగు మాత్రమే ప్రధానంగా పరిగణిస్తున్నారు. అవే

ఐతరేయ, కౌశీతకీ – ఋగ్వేదం నుండి

ఈశ, కఠ, తైత్తరీయ, బృహదారణ్యక, శేతాశ్వతర, మైత్రాయణీ, మహానారాయణా – యజుర్వేదం నుండి

కేన, ఛాంద్యోగ- సామవేదం నుండి

ప్రశ్న, ముండక, మాండూక్య – అథర్వణ వేదం నుండి.

కేవలం శాస్త్ర జ్ఞానంతోనో,పాండిత్యం వలనో ఉపనిషత్తుల నిజమైన అర్థాన్ని గ్రహించడం సాధ్యం కాదు. నిజమైన సాధనామయ జీవితంలో పాల్గొని, మనస్సుని పావనం చేసుకుని భగవదభిముఖంగా సాగే కొద్దీ వాటి అంతరార్థం మనకి మరింత లోతుగా అవగతమవుతుంది.